Für einen Besuch im Bogn Engiadina benötigen Sie als Gast (ab 16 Jahren) ein Covid-Zertifikat.

Informationen zum Schutzkonzept

Trattamaint e cussagliaziun individual/-a.

Nossa fisioterapia

Wassertherapie im Bewegungsbecken des Bogn Engiadina Scuol Ein Therapeut massiert den Rücken einer Patientin
Il center da cumpetenza per fisioterapia in Engiadina Bassa suot il tet dal Center da sandà Engiadina Bassa (CSEB) spordscha seis servezzans in quists lös: Bogn d'aua minerala Bogn Engiadina Scuol, Ospidal Scuol e Clinica Curativa sco eir illa Chasa da chüra Chasa Puntota. El vain coordinà in möd central e professiunal.

Ellas/Els chattan in tuot noss lös ün vast spectrum da terapias ed üna gronda schelta da specialists chi's perfecziune­schan cuntinuadamaing. Il böt da la fisioterapia es d'elavurar cun Ellas/Els andamaints optimals dals movimaints e da las func­ziuns dal corp e da tillas integrar illa vita da minchadi, illa professiun ed i'l sport. Quist succeda tant cun terapias activas sco eir passivas. Il team da la Fisioterapia CSEB Tillas/Tils sustegna ed accumpogna sün quista via cun ün trattamaint ed üna cussagliaziun, quai in möd individual chi'd es adattà a Lur problems. In quist connex ans sta fich a cour la promoziun da la respunsabiltà persunala per ragiundscher insembel ils böts in mera.

Uschè chattan Ellas/Els a nus

Center da sandà Engiadina Bassa
Lö: Bogn Engiadina
Via dals Bogns 323
CH-7550 Scuol

Tel +41 81 861 13 40
therapie@cseb.ch

La spüerta dals trattamaints

Terapia da's mouver (impè da fisioterapia)

Cun exercizis chi vegnan coordinats cul paziaint vain amegldrada la movibiltà, sviluppada la forza, la persistenza, la coordinaziun e l'equiliber e tut in mera üna posiziun dal corp optimala.

Fisioterapia da sport

La fisioterapia da sport as basa sün la medicina da sport, la scienza da trenamaint e la fisioterapia e cumpiglia la chüra fisioterapeutica da sportists da tuot las classas da prestaziun, sco eir quella da paziaints davo mals e feridas vi da l'apparat motoric.

Terapia da trenamaint medicinala (TTM)

Il böt da la terapia da trenamaint medicinala es da restabilir ed amegldrar las funcziuns muscularas sco forza, cundiziun, stabilità e coordinaziun. La TTM regulara sustegna il process da reabilitaziun ed amegldrescha funcziuns insufficiaintas dal corp.

Idroterapia

Movimaints reuschischan aint ill'aua suvent plü liger co sül terrain. Il motiv per quai es la forza portanta da l'aua chi renda plü simpel d'exercitar ill'aua e schanaja las lisüras. Las caracteristicas fisicalas (impulsiun, resistenza, chalur) vegnan applichadas consciaintamaing dal terapeut per fuormar ün program d'exercizis adattà al cliaint.  L'idroterapia ha lö natüralmaing aint il Bogn d'aua minerala Bogn Engiadina. Ün evenimaint terapeutic unic.

Fisioterapia pedriatica

Il trattamaint da naschentschas prematuras, poppins, uffants pitschens, uffants e giuvenils in cas da problems specifics per uffants, in quist connex vegnan applichadas metodas terapeuticas correspundentas. Il trattamaint vain adattà al stadi da svilup sensomotoric.

Terapia manuala

La terapia manuala es üna fuorma da terapia chi's lascha applichar in blers cas da disturbis acuts o cronics da la motorica vi dal spinal e lisüras, musclas e nervs.

Tecnicas miofascialas per las parts lommas

Cun agüd da tecnicas miofascialas fastizia il terapeut disturbis da la funcziun da las musclas e fascias e tillas tratta. In quist connex applichescha el differentas tecnicas da schmachar e trar chi stimuleschan tanter oter la circulaziun dal sang i'l tessü e dessan uschè avair ün meglder effet sün la tensiun dal tessü.

Taping

Cun metter sü implasters kinesiotics, implasters myofascials o üsitats vegnan stabilisadas o influenzadas lisüras, musclas o eir lioms. Lur funcziun vain quatras sustgnüda o tensiuns vegnan normalisadas ed equilibradas.

Terapia punctuala trigger

Ils böts d'üna terapia punctuala trigger sun da schlockiar indüridas muscularas localas (puncts trigger) e d'amegldrar la circulaziun dal sang.

Dry Needling

«Dry needling» es üna cumplettaziun efficazia da la terapia da puncts trigger. In quista occasiun vain fourà cun üna guoglia stiglia fich precis aint il punct tigger chi'd es respunsabel pels mals actuals. Cun quai vegnan schlockiadas las bloccadas, amegldrada la situaziun da circulaziun dal sang locala e sbassadas las reacziuns d'inflammaziun localas.

Terapia viscerala

Il böt da quist concept da trattamaint integrativ manual es da trattar disturbis da la funcziun da l'apparat motoric cun agüd dal sistem d'organs e da manar inavo il corp darcheu in seis equiliber.

Terapia da respirar

Terapia da respirar reflex (TRR): Il böt principal es quel da sustegner e stimular cun diversas manipulaziuns il torax, il diafragma, la musculatura da respirar auxiliara e'l sistem da la nerva correspundent in lur funcziun. Quai pissera uschè per üna respiraziun resp. expiraziun da reflex. Spirotiger®: Il Spirotiger® es ün urdegn d'exercizi mobil chi rinforza la musculatura da respiraziun e dal corp cun til dovrar regularmaing, augmainta il volumen da respirar ed amegldrescha il barat da gas dals pulmuns. L'urdegn es adattà tant per paziaints in connex cun üna terapia da respirar sco eir per sportists per intents d'ün trenamaint cardiovascular.

Drenascha manuala da las limfas e terapia da decongestiun fisicala cumplexa

La drenascha da las limfas es üna tecnica manuala pel trattamaint dad edems. Edems sun ufladüras dal tessü in consequenza da retenziun da liquids e limfas, pelplü illa bratscha o illas chommas. Cun la drenascha da las limfas da las regiuns dal corp pertoccas vegnan transportats davent ils liquids retgnüts, las ufladüras van inavo. Quist po gnir sustgnü cun bandaschas da cumpressiun.

Terapia da las nattas

Cun üna tecnica speciala vegnan terapadas las nattisaziuns diagnostichadas.

Concepts da trattamaint neurologics

In cas da malatias dal sistem da nervas central e perifer (paralisa d'üna vart dal corp, trauma da la chavazza e dal tscharvè, sclerosa multipla e malatia da Parkinson) vain applichà il concept Bobath, la Facilitaziun Proprioceptiva e la tecnica-E tenor Hanke.

Reabilitaziun dal fuond dal batschigl

Il fuond dal batschigl sustegna ils organs interns sco la vaschia, il bögl e la madra. Scha la musculatura dal fuond dal batschigl vain disturbada in sia funcziun, saja quai pervi d'üna deblezza o massa gronda tensiun da las musclas, po quai gnir influenzà in möd positiv cun ün trenamaint intenziunà.

Trenamaint autogen

Üna metoda scientifica, cun la quala i's ragiundscha svess üna detensiun profuonda.

Ultrasun

Ultrasun terapeutic cumpiglia l'applicaziun d'uondas acusticas cun üna frequenza da vibraziun sur la frequenza d'udida. L'ultrasun effettuescha üna circulaziun dal sang rinforzada, ün metabolissem cellular amegldrà sco eir üna reducziun da las dolurs.

Terapia cun uondas da schoc (terapia cun uondas da schoc extracorporala focussada)*

Uondas da schoc sun impuls acustics richs d'energia e specialmaing cuorts. Prodots d'ün generatur vegnan transportadas las uondas da schoc sün las zonas da dolur aint il corp uman, ingio ch'ellas fan lur effet terapeutic. Las forzas autocurativas aint il corp vegnan stimuladas ed accelereschan ils process da guarischun.

Electroterapia

Cun l'electroterapia vain lavurà cun differents curraints energetics. Tuot tenor la fuorma da curraint (frequenza, amplituda, spectrum d'impuls etc.) po gnir effettuà ün surleivg da dolurs, üna promoziun da la circulaziun dal sang, üna detensiun o ün rinforzamaint da la musculatura, ün augmaint dal metabolissem o üna resorpziun da l'edem.

Massascha da la spina dorsala tenor Breuss

La massascha tenor Breuss es ün trattamaint fin e sensibel da la spina dorsala. Sco massascha da la rain energetic-manuala po ella schlockiar bloccadas mentalas, energeticas e corporalas e s'adatta excellentamaing per schlockiar musculatura aira.

Bogn d'acid carbonic

Aint il center da terapia dal Bogn Engiadina Scuol vain dovrada l'aua curativa in fuorma da batschigls da bogn singuls tenor aspets da la medicina. Las funtanas termalas chi vegnan ütilisadas qua muossan concentraziuns d'acid carbonic bler plü otas co la media al cunfin da saturaziun. Ella serva tanter oter per promouver la circulaziun e per calmar il sistem da la nerva. Ultra da quai ha ella ün effet chi mitigescha la dolur ed impedischa malatias bacterialas.

 

Ch'Ellas/Els as remarchan per plaschair

* Quistas prestaziuns nu vegnan surtuttas da la sgüranza da basa, però da bleras sgüranzas supplementaras. Ch'Ellas/Els s'infuorman per plaschair scha Lur chascha d'amalats surpiglia quistas prestaziuns.

 

Im Therapie- und Wellnesszentrum Bogn Engiadina betreut ein Therapeut einen Patienten